Marhala Dil Ka Na TasKHir Hua

marhala dil ka na tasKHir hua

tu kahan aa ke inan-gir hua

kaam duniya ka hai tir-andazi

hum hue ya koi naKHchir hua

sang-e-buniyaadi hain hum us ghar ka

jo kisi tarah na tamir hua

safar-e-shauq ka hasil malum

rasta panw ki zanjir hua

umr-bhar jis ki shikayat ki hai

dil usi aag se iksir hua

kis se puchhen ki wo andaz-e-nazar

kab tabassum hua kab tir hua

kaun ab dad-e-suKHan de 'baqi'

jis ne do sher kahe 'mir' hua