Hamara Dil Sawere Ka Sunahra Jam Ho Jae

hamara dil sawere ka sunahra jam ho jae

charaghon ki tarah aankhen jalen jab sham ho jae

kabhi to aasman se chand utre jam ho jae

tumhaare nam ki ek KHub-surat sham ho jae

ajab haalat the yun dil ka sauda ho gaya aaKHir

mohabbat ki haweli jis tarah nilam ho jae

samundar ke safar mein is tarah aawaz de hum ko

hawaen tez hon aur kashtiyon mein sham ho jae

mujhe malum hai us ka Thikana phir kahan hoga

parinda aasman chhune mein jab nakaam ho jae

ujale apni yaadon ke hamare sath rahne do

na jaane kis gali mein zindagi ki sham ho jae