Ishq Jo Na-gahan Nahin Hota
ishq jo na-gahan nahin hota
wo kabhi jawedan nahin hota
ishq rakhta hai jis jagah dil ko
main bhi aksar wahan nahin hota
mujh pe hote hain mehrban jab wo
KHud par apna guman nahin hota
ishq hota hai dil ka ek aalam
aur dil ka bayan nahin hota
main ne dekha hai un ki mahfil mein
kuchh zaman o makan nahin hota
ishq hota hai dil-ba-dil mahsus
ye fasana bayan nahin hota
Bismil Saeedi 
(856) Peoples Rate This