Nind Ke Taaqub Mein

nind ke taaqub mein

dur dur tak la-hasil

der se bhaTakta hun

nili aankhon wali

jangali billi

bar bar dum hilati hai

meri chaarpai ke niche

nim raushan lamp ke ird-gird

kiDon par jhapaTti chhipkali

be-KHabar hai apne ant se

kitna ghair-mutawaqqe hoga

mil jaana anant se

miTTi ke tel ki gandh

qulanchen bhar rahi hai kamre mein

be-lagam ghoDi ki tarah

chhat par

rengti hui KHamoshi

bar bar dohra rahi hai

papi nishacharon ka git

aur nind milon dur

kisi na-malum daraKHt ke patton mein chhupi

chiDiyon sa chahchaha rahi hai

mujhe bula rahi hai