Dil-e-barbaad Ko ChhoTa Sa Makan Bhi Dega

dil-e-barbaad ko chhoTa sa makan bhi dega

jab naya zaKHm bharega to nishan bhi dega

pahle guzrunga main ummid o yaqin ki rah se

phir tera pyar mujhe wahm-o-guman bhi dega

paikar-e-rang jo pal bhar mein bikhar jaega

jagti aankhon ko KHwabon ka jahan bhi dega

tum jalana mujhe chaho to jala do lekin

naKHl-e-taza jo jalega to dhuan bhi dega

waqt deta hai jinhen aaj khilaune 'aKHtar'

unhin atfal ko kal tir-o-sinan bhi dega