Subh-e-azadi (August-47)

ye dagh dagh ujala ye shab-gazida sahar

wo intizar tha jis ka ye wo sahar to nahin

ye wo sahar to nahin jis ki aarzu le kar

chale the yar ki mil jaegi kahin na kahin

falak ke dasht mein taron ki aaKHiri manzil

kahin to hoga shab-e-sust-mauj ka sahil

kahin to ja ke rukega safina-e-gham dil

jawan lahu ki pur-asrar shah-rahon se

chale jo yar to daman pe kitne hath paDe

dayar-e-husn ki be-sabr KHwab-gahon se

pukarti rahin bahen badan bulate rahe

bahut aziz thi lekin ruKH-e-sahar ki lagan

bahut qarin tha hasinan-e-nur ka daman

subuk subuk thi tamanna dabi dabi thi thakan

suna hai ho bhi chuka hai firaq-e-zulmat-o-nur

suna hai ho bhi chuka hai visal-e-manzil-o-gam

badal chuka hai bahut ahl-e-dard ka dastur

nashat-e-wasl halal o azab-e-hijr haram

jigar ki aag nazar ki umang dil ki jalan

kisi pe chaara-e-hijran ka kuchh asar hi nahin

kahan se aai nigar-e-saba kidhar ko gai

abhi charagh-e-sar-e-rah ko kuchh KHabar hi nahin

abhi girani-e-shab mein kami nahin aai

najat-e-dida-o-dil ki ghaDi nahin aai

chale-chalo ki wo manzil abhi nahin aai

(8015) Peoples Rate This

Your Thoughts and Comments

Subh-e-azadi (August-47) In English By Famous Poet Faiz Ahmad Faiz. Subh-e-azadi (August-47) is written by Faiz Ahmad Faiz. Read famous Poem Subh-e-azadi (August-47) for youth and Student by Faiz Ahmad Faiz. Free Download Subh-e-azadi (August-47) in PDF.