Dil Mein Shagufta Gul Bhi Hain Raushan Charagh Bhi

dil mein shagufta gul bhi hain raushan charagh bhi

kya chiz hain ye soz-e-mohabbat ke dagh bhi

TuTa tha ek jam-e-sifali na jaane kyun

rindon ne toD Dale munaqqash ayagh bhi

tadbir-e-chaara-sazi-e-dil sochne ke baad

rahta hai bad-guman mere dil se dimagh bhi

hum wo nahin jo maut ke pardon mein kho gae

hum ne to zindagi ka lagaya suragh bhi

hum ne to raaz-e-ishq chhupaya magar 'farid'

chaaragaron ne DhunDh liye dil ke dagh bhi