Hamare Samne Begana-war Aao Nahin

hamare samne begana-war aao nahin

niyaz-e-ahl-e-mohabbat ko aazmao nahin

hamein bhi apni tabahi pe ranj hota hai

hamare haal-e-pareshan pe muskurao nahin

jo tar TuT gae hain wo juD nahin sakte

karam ki aas na do baat ko baDhao nahin

diye KHulus o mohabbat ke bujhte jate hain

giran na ho to hamein is qadar satao nahin

dil o nigah ko kab tak koi bichhae rahe

ye dekh kar ki udhar se koi jhukao nahin

ye aur baat hai kanTon mein ji bahal jae

nahin ki lala-o-gul se mujhe lagao nahin