Mila Hai Jism Ki Us Ka Guman Mila Hai Mujhe

mila hai jism ki us ka guman mila hai mujhe

wo hath aa ke bhi aksar kahan mila hai mujhe

main sirf dekh hi sakta hun chashm-e-sahil se

ki wo badan ajab aab-e-rawan mila hai mujhe

faroKHt kar ke KHasare mein aa gaya bazar

to soch lo ki wo kitna garan mila hai mujhe

achanak aaj mera zaKHm baat karne laga

bahut dinon mein koi ham-zaban mila hai mujhe

hamesha der se pahuncha main us ki mahfil mein

bajae aag hamesha dhuan mila hai mujhe

ajab kashakash-e-iman-o-kufr rahti hai

wo but hamesha ba-waqt-e-azan mila hai mujhe

ulaT ke rakh diya 'ehsas' ne hisab-e-umr

wo rose kal se ziyaada jawan mila hai mujhe