Zamin ChiKH Rahi Hai Ki Aasman Gira

zamin chiKH rahi hai ki aasman gira

ye kaisa bojh hamare badan pe aan gira

bahut sambhaal ke rakh be-sabaat lamhon ko

zara jo sanki hawa ret ka makan gira

is aaine hi mein logon ne KHud ko pahchana

bhala hua ki main chehron ke darmiyan gira

rafiq-e-samt-e-safar hogi jo hawa hogi

ye soch kar na safine ka baadban gira

main apne ahd ki ye tazgi kahan le jaun

ek ek lafz qalam se lahuluhan gira

qarib o dur koi shola-e-nawa bhi nahin

ye kin andheron mein hathon se shama-dan gira

'faza' ko toD to phenka hawaon ne lekin

ye phul apni hi shaKHon ke darmiyan gira