Naumid Kare Dil Ko Na Manzil Ka Pata De

naumid kare dil ko na manzil ka pata de

ai rah-guzar-e-ishq tere kya hain irade

har raat guzarta hai koi dil ki gali se

oDhe hue yaadon ke pur-asrar libaade

ban jata hun sar-ta-ba-qadam dast-e-tamanna

Dhal jate hain ashkon mein magar shauq irade

us chashm-e-fusun-gar mein nazar aati hai aksar

ek aatish-e-KHamosh ki jo dil ko jala de

aazurda-e-ulfat ko gham-e-zindagi jaise

tapte hue jangal mein koi aag laga de

yaadon ke mah-o-mehr tamannaon ke baadal

kya kuchh na wo saughat sar-e-dasht-e-wafa de

yaad aati hai us husn ki yun 'jafari' jaise

tanhai ke ghaaron se koi KHud ko sada de