Dard Ke Chand Ki Taswir Ghazal Mein Aae
dard ke chand ki taswir ghazal mein aae
sher likkhun to ye tasir ghazal mein aae
sunte aae hain bahut zikr hasin KHwabon ka
ab kisi KHwab ki tabir ghazal mein aae
un ke chehre ko main is tarah paDha karta hun
jaise gham ki koi tafsir ghazal mein aae
khet khaliyan se jab sanwli surat lauTe
surmai sham ki tanwir ghazal mein aae
apne kirdar ka kuchh aks to jhalke 'anjum'
aaine ki koi tahrir ghazal mein aae
Ghayas Anjum 
(658) Peoples Rate This