Daur-e-falak Ke Shikwe Gile Rozgar Ke

daur-e-falak ke shikwe gile rozgar ke

hain mashghale yahi dil-e-na-karda-kar ke

yun dil ko chheD kar nigah-e-naz jhuk gai

chhup jae koi jaise kisi ko pukar ke

sine ko apne apna gareban bana ke hum

qael nahin hain pairahan-e-tar-tar ke

kya kijiye kashish hai kuchh aisi gunah mein

main warna yun fareb mein aata bahaar ke

ek dil aur us pe hasrat-e-arman ka ye hujum

kya kya karam hain mujh pe mere kard-gar ke

hum ko to roz-e-hashr ka bhi kuchh yaqin nahin

kya muntazir hun wada-e-farda-e-yar ke

kis dil se tera shikwa-e-bedad kar saken

mare hue hain hum nigah-e-sharmsar ke