Shab-tab

ye barasta hua mausam ye shab-e-tira-o-tar

kisi maddham se sitare ki ziya bhi to nahin

uff ye virani-e-mahaul ye virani-e-dil

aasmanon se kabhi nur bhi barsa hoga

barq-e-ilham bhi lahra gai hogi shayad

lekin ab dida-e-hasrat se su-e-arsh na dekh

ab wahan ek andhere ke siwa kuchh bhi nahin

dekh us farsh ko jo zulmat-e-shab ke ba-wasf

raushni se abhi mahrum nahin hain shayad

ek na ek zarra yahan ab bhi damakta hoga

koi jugnu kisi goshe mein chamakta hoga

ye zamin nur se mahrum nahin ho sakti

kisi jaan-baz ke mathe pe shahadat ka jalal

kisi majbur ke sine mein baghawat ki tarang

kisi doshiza ke honTon pe tabassum ki lakir

qalb-e-ushshaq mein mahbub se milne ki umang

dil-e-zuhhad mein na-karda gunahon ki KHalish

dil mein ek fahisha ke pahli mohabbat ka KHayal

kahin ehsas ka shoala hi farozan hoga

kahin afkar ki qindil hi raushan hogi

koi jugnu koi zarra to damakta hoga

ye zamin nur se mahrum nahin ho sakti

ye zamin nur se mahrum nahin ho sakti