Ye Kaisi Hawa-e-gham-o-azar Chali Hai

ye kaisi hawa-e-gham-o-azar chali hai

KHud baad-e-bahaari bhi sharar-bar chali hai

dekhi hi na thi jis ne shikast aaj tak apni

wo chashm-e-fusun-KHez bhi dil haar chali hai

ab koi hadis-e-qad-o-gesu nahin sunta

duniya mein wo rasm-e-rasan-o-dar chali hai

takta hi nahin koi mai o jam ki jaanib

kya chaal ye tu ne nigah-e-yar chali hai

wo log kahan jaen jo kafir hain na din-dar

phir kashmakash-e-kafir-o-din-dar chali hai

baat aur bhi kuchh mai ki mazammat ke alawa

ye baat to ai shaiKH kai bar chali hai

diwangi-e-shauq mein jo kar gae hum log

meyar-e-KHirad ban ke wo guftar chali hai

sazish na ho kuchh dair o haram walon ki is mein

sunta hun ki mai-KHane mein talwar chali hai

kab yaad kiya hum ko 'hafiz' ahl-e-chaman ne

jab zist su-e-wadi-e-pur-KHar chali hai