Suna Hai ZaKHmi-e-tegh-e-nigah Ka Dam Nikalta Hai

suna hai zaKHmi-e-tegh-e-nigah ka dam nikalta hai

tera arman le ai qatil-e-alam nikalta hai

na aankhon mein murawwat hai na ja-e-rahm hai dil mein

jahan mein bewafa mashuq tum sa kam nikalta hai

kaha aashiq se waqif ho to farmaya nahin waqif

magar han is taraf se ek na-mahram nikalta hai

mohabbat uTh gai sare zamane se magar ab tak

hamare doston mein ba-wafa ek gham nikalta hai

pata qasid ye rakhna yaad us qatil ke kuche se

koi nalan koi bismil koi be-dam nikalta hai