Yun Bhi Kya Tha Aur Ab Kya Rah Gaya

yun bhi kya tha aur ab kya rah gaya

main akela tha akela rah gaya

hijr mein hai kaun kitna be-qarar

lekin in baaton mein ab kya rah gaya

maslahat kafir thi baz aai nahin

dil wo nadan tha ki rota rah gaya

saqi-e-umr-e-do-roza yaad rakh

meri jaanib se taqaza rah gaya

chaarasazo bhul jaunga use

ab sunao zaKHm kitna rah gaya

zindagi kuchh is tarah kaTti gai

jaise koi hath malta rah gaya

bhiD tanhai ki chhuTti hi nahin

har taraf chehra hi chehra rah gaya

maut kya aati bichhaD kar dost se

dekh lo 'almas' zinda rah gaya