Be-iltifati

main ne har gham mein tera sath diya hai ab tak

teri har taza masarrat pe hua hun masrur

apni qismat ke badalte hue dhaaron ke siwa

teri qismat ke bhanwar se bhi hua hun majbur

tere sine ka har ek raaz bata sakta hun

mujh mein poshida nahin koi tera soz-e-darun

fikr-e-manus pe zahir hai har ek KHwab-e-jamil

aur har KHwab se milta hai tujhe kitna sukun

aaj tak tu ne magar mujh se na puchha hai kabhi

kyun mere gham se tera chehra utar jata hai?

jab mere dil mein lahakte hain masarrat ke kanwal

kyun tera chehra masarrat se nikhar jata hai?