Aur Bhi Ho Gae Begana Wo Ghaflat Kar Ke

aur bhi ho gae begana wo ghaflat kar ke

aazmaya jo unhen zabt-e-mohabbat kar ke

dil ne chhoDa hai na chhoDe tere milne ka KHayal

bar-ha dekh liya hum ne malamat kar ke

dekhne aae the wo apni mohabbat ka asar

kahne ko ye hai ki aae hain ayaadat kar ke

pasti-e-hausla-e-shauq ki ab hai ye salah

baiTh rahiye gham-e-hijran pe qanaat kar ke

dil ne paya hai mohabbat ka ye aali rutba

aap ke dard-e-dawa-kar ki KHidmat kar ke

ruh ne pai hai taklif-e-judai se najat

aap ki yaad ko sarmaya-e-rahat kar ke

chheD se ab wo ye kahte hain ki sambhlo 'hasrat'

sabr o tab-e-dil-e-bimar ko ghaarat kar ke