Us But Ke Pujari Hain Musalman Hazaron

us but ke pujari hain musalman hazaron

bigDe hain isi kufr mein iman hazaron

duniya hai ki un ke ruKH o gesu pe miTi hai

hairan hazaron hain pareshan hazaron

tanhai mein bhi tere tasawwur ki badaulat

dil-bastagi-e-gham ke hain saman hazaron

ai shauq teri pasti-e-himmat ka bura ho

mushkil hue jo kaam the aasan hazaron

aankhon ne tujhe dekh liya ab unhen kya gham

haalanki abhi dil ko hain arman hazaron

chhane hain tere ishq mein aashufta-sari ne

duniya-e-musibat ke bayaban hazaron

ek bar tha sar gardan-e-'hasrat' pe rahenge

qatil teri shamshir ke ehsan hazaron