Rakhi Bandhan

zindagi ke kai mear hain

waraq waraq

ek ruKH-e-ehsas ko

fitri aur masnui sath par banTana

apne aur parae ko

do daeron mein taqsim karna

ya barud ke dhamakon mein

zamin ko TukDe TukDe karna

zindagi barae zindagi ko manne wale

waqt ka kohra chhaTte hi

aastha ke aks phaila dete hain

pagal KHayal ki shiddat ghaT jati hai

us pal shaKH-dar-shaKH

phailne wali KHushbu

kisi ajnabi kalai par

ek rakhi bandh deti hai

pal bhar mein kaDwi sachchaiyan

rishton ki tamam haden toD kar

bhai bahan ke rishte mein badal jati hain

zehn mein maujud tamam talKHiyan

KHushnuma ehsas mein

KHud-baKHud Dhal jati hain

'imam-azam' ki dua hai

be-misal rishte ka ye bandhan

sada qaem rahe