Mujhe Sanson Ki Hai ThoD Piya

mujhe sanson ki hai thoD piya

mera sath abhi mat chhoD piya

kari minnat zari tar le sab

main ne hath diye hain joD piya

meri mang sindur se KHali kar

hari chuDi aa kar toD piya

kahin parbat par main bas jaun

jahan dikhe na mera koDh piya

main ne pag pag teri balaen lin

main ne phunke wird karoD piya

meri aas ki sans ukhaDti hai

tu mukh apna na moD piya

tera hijr wichhoDa mar gaya

liya sara lahu nichoD piya

meri aankhen ro ro KHak huin

mere ashk na aise roD piya

tere sikke mujh ko sona hain

chal maTi maTki phoD piya

mera haal dhamal hai jogan sa

main ne wajd liya hai oDh piya

hai ye prem janm-janmata ka

mujhe sat janam teri loD piya