Apni Ana Ki Aaj Bhi Taskin Humne Ki
apni ana ki aaj bhi taskin hum ne ki
ji bhar ke us ke husn ki tauhin hum ne ki
lahje ki tez dhaar se zaKHmi kiya use
paiwast dil mein lafz ki sangin hum ne ki
lae ba-ru-e-kar na husn o jamal ko
mauqa tha phir bhi raat na rangin hum ne ki
ji bhar ke dil ki maut pe rone diya use
pursa diya na sabr ki talqin hum ne ki
dariya ki sair karne akele chale gae
sham-e-shafaq ki aap hi tahsin hum ne ki
Iqbal Sajid 
(2100) Peoples Rate This