Ghamon Mein Kuchh Kami Ya Kuchh Izafa Kar Rahe Hain

ghamon mein kuchh kami ya kuchh izafa kar rahe hain

samajh mein kuchh nahin aata ki hum kya kar rahe hain

jo aata hai nazar mein us ko le aate hain dil mein

nai tarkib se hum KHud ko tanha kar rahe hain

nazar karte hain yun jaise bichhaDne ki ghaDi ho

suKHan karte hain aise jaise girya kar rahe hain

tumhaare hi talluq se to hum hain is badan mein

tumhaare hi liye to ye tamasha kar rahe hain

zawal-e-amadgi ab gunjti hai dhaDkanon mein

so dil se KHwahishon ka bojh halka kar rahe hain

suKHan tum se ho ya ahbab se ya apne dil se

yahi lagta hai hum har baat beja kar rahe hain

tumhaari aarzu hone se pahle bhi to hum the

so jaise ban paDe ab bhi guzara kar rahe hain

zara puchhe koi madum hote in dukhon se

hamein kis ke bharose par akela kar rahe hain

hamein roke hue hai pas-e-namus-e-mohabbat

ye mat samjho ki hum duniya ki parwa kar rahe hain

ba-juz-sina-KHarashi kuchh nahin aata hai lekin

zara dekho to hum ye kaam kaisa kar rahe hain

hamein is kaam ki mushkil ka andaza hai sahab

baDe arse se hum bhi tark-e-duniya kar rahe hain

jo hogi subh to taqsim ho jaenge phir hum

Dhali hai sham to KHud ko ikaTTha kar rahe hain

junun se itna derina talluq toD denge?

are tauba karen 'irfan', ye kya kar rahe hain

(595) Peoples Rate This

Your Thoughts and Comments

Ghamon Mein Kuchh Kami Ya Kuchh Izafa Kar Rahe Hain In English By Famous Poet Irfan Sattar. Ghamon Mein Kuchh Kami Ya Kuchh Izafa Kar Rahe Hain is written by Irfan Sattar. Read famous Poem Ghamon Mein Kuchh Kami Ya Kuchh Izafa Kar Rahe Hain for youth and Student by Irfan Sattar. Free Download Ghamon Mein Kuchh Kami Ya Kuchh Izafa Kar Rahe Hain in PDF.