Teri Yaad

raat phir tere KHayalon ne jagaya mujh ko

TimTimati hui yaadon ka zara sa shoala

aaj bhaDka to phir ek shoala-e-jawwala bana

aql ne tujh ko bhulane ke kiye lakh jatan

le gae mujh ko kabhi misr ke bazaron mein

kabhi italy kabhi espen ke gulzaron mein

belgium ke, kabhi holland ke mai-KHanon mein

kabhi paris, kabhi london ke sanam-KHanon mein

aur main aql ki baaton mein kuchh aisa aaya

main ye samjha ki tujhe bhul chuka hun shayad

dil ne to mujh se kai bar kaha wahm hai ye

is tarah tujh ko bhulana koi aasan nahin

main magar wahm mein kuchh aisa giraftar raha

main ye samjha ki tujhe bhul chuka hun shayad

kal magar phir teri aawaz ne taDpa hi diya

aalam-e-KHwab se goya mujhe chaunka hi diya

aur phir tera har ek naqsh mere samne tha

teri zulfen, teri zulfon ki ghaTaon ka saman

teri chitwan, teri chitwan wahi baatin ka suragh

tere aariz wahi KHush-rang mahakte hue phul

teri aankhen wo sharabon ke chhalakte hue jam

tere lab jaise sajae hue do barg-e-gulab

teri har baat ka andaz teri chaal ka husn

tere aane ka nazara tere jaane ka saman

tera har naqsh to kya tu hi mere samne thi

dil ne jo baat kai bar kahi thi mujh se

shab ke anwar mein bhi din ke andheron mein bhi

mere ehsas mein ab gunj rahi thi paiham

is tarah tujh ko bhulana koi aasan nahin

dil haqiqat hai koi KHwab-e-pareshan to nahin

yaad manind-e-KHirad maslahat-andesh nahin

Dubti ye nahin holland ke mai-KHanon mein

gum nahin hoti ye paris ke sanam-KHanon mein

ye bhaTakti nahin espen ke gulzaron mein

bhulti rah nahin misr ke bazaron mein

yaad manind-e-KHirad maslahat-andesh nahin

aql ayyar hai sau bhes bana leti hai

yaad ka aaj bhi andaz wahi hai ki jo tha

aaj bhi us ka hai aahang wahi rang wahi

bhes hai us ka wahi taur wahi Dhang wahi

phir isi yaad ne kal raat jagaya mujh ko

aur phir tera har ek naqsh mere samne tha