Band Kar BaiThe Ho Ghar Radd-e-bala Ki KHatir
band kar baiThe ho ghar radd-e-bala ki KHatir
ek khiDki to khuli rakhte hawa ki KHatir
bhenT chaDhte rahe har daur mein insan kitne
fard-e-wahid ki faqat jhuTi ana ki KHatir
har zabardast ka har zulm saha hai main ne
zindagi mahz teri hirs-e-baqa ki KHatir
Dar jahannam ka na jannat ki hawas hai mujh ko
sar jhukaya hai faqat teri raza ki KHatir
main siyah-baKHt jise mar ke apnon ne 'jalil'
ghair ko dosh diya KHun-baha ki KHatir
Jaleel Haider Lashari 
(721) Peoples Rate This