Pahle Ki Ba-nisbat Hai Mujhe Kaam Ziyaada

pahle ki ba-nisbat hai mujhe kaam ziyaada

dil ko hai magar KHwahish-e-aram ziyaada

nakaam rahi shaeri jin pesh-rawon ki

dete hain azizon ko wo paigham ziyaada

kam-kosh the kaj apni kulah rakh nahin pae

baghi na bane aur hue badnam ziyaada

kuchh haare hue baiTh ke ab soch rahe hain

aaghaz kya kam hua anjam ziyaada

duniya se tawaqqoa nahin kuchh dad-o-sitad ki

KHuban ko sada deti hai dushnam ziyaada