Yunhi Udas Hai Dil Be-qarar ThoDi Hai

yunhi udas hai dil be-qarar thoDi hai

mujhe kisi ka koi intizar thoDi hai

nazar mila ke bhi tum se gila karun kaise

tumhaare dil pe mera iKHtiyar thoDi hai

mujhe bhi nind na aae use bhi chain na ho

hamare bich bhala itna pyar thoDi hai

KHizan hi DhunDhti rahti hai dar-ba-dar mujh ko

meri talash mein pagal bahaar thoDi hai

na jaane kaun yahan sanp ban ke Das jae

yahan kisi ka koi e'tibar thoDi hai