Dil Ko Duniya Ka Hai Safar Darpesh

dil ko duniya ka hai safar darpesh

aur chaaron taraf hai ghar darpesh

hai ye aalam ajib aur yahan

majra hai ajib-tar darpesh

do jahan se guzar gaya phir bhi

main raha KHud ko umr bhar darpesh

ab main ku-e-abas shitab chalun

kai ek kaam hain udhar darpesh

us ke didar ki ummid kahan

jab ki hai did ko nazar darpesh

ab meri jaan bach gai yani

ek qatil ki hai sipar darpesh

kis tarah kuch par kamar bandhun

ek rahzan ki hai kamar darpesh

KHalwat-e-naz aur aaina

KHud-nigar ko hai KHud-nigar darpesh