Tum Kaho To Kahun

harf ke tar mein jitne aansu piroe gae

dard un se fuzun tha

suno to kahun

tum kaho to kahun zarf ki dastan

ketiyon ko gila baadalon se nahin surajon se bhi tha

bazuon se bhi tha hal pakaDne se pahle hi jo thak gae

kisht-e-zar-KHez par aab-e-namkin jam sa gaya

raqs tham sa gaya

eDiyan ghumte ghumte ruk gain

ashk ruKHsar ki ghaTiyon se gira munjamid ho gaya

rang KHushbu bana to hawa chal paDi

KHwab nata bana to khuli khiDkiyon mein salaKHen ugin

hath zaKHmi hue

kis ke kashkol se kitne sikke gire

hijr kaisa parinde ki aankhon mein tha

ghaw kaise pahaDon ke sine pe the

aaina gung tha

farsh par aks dham se gira

kirchiyan ho gaya

tum kaho to ginun

tum kaho to chunun

tum kaho to sunun in khule phul ki dhaDkanen

gum-shuda titliyon ki sada

zard Tahni ke honTon pe rakkhi hui bad-dua

aasmanon ki dahliz par phenk dun

tum kaho to dikhaun tumhein

ek tamasha ki jo meri muTThi mein hai

ek gardan ki jo gham ke phande mein hai

sans chalti bhi hai aur chalti nahin

jaan nikalti nahin

(812) Peoples Rate This

Your Thoughts and Comments

Tum Kaho To Kahun In English By Famous Poet Javaid Anwar. Tum Kaho To Kahun is written by Javaid Anwar. Read famous Poem Tum Kaho To Kahun for youth and Student by Javaid Anwar. Free Download Tum Kaho To Kahun in PDF.