Ye Mujhse Puchhte Hain Chaaragar Kyun

ye mujh se puchhte hain chaaragar kyun

ki tu zinda to hai ab tak magar kyun

jo rasta chhoD ke main ja raha hun

usi raste pe jati hai nazar kyun

thakan se chur pas aaya tha us ke

gira sote mein mujh par ye shajar kyun

sunaenge kabhi fursat mein tum ko

ki hum barson rahe hain dar-ba-dar kyun

yahan bhi sab hain begana hi mujh se

kahun main kya ki yaad aaya hai ghar kyun

main KHush rahta agar samjha na hota

ye duniya hai to main hun dida-war kyun