Zara Mausam To Badla Hai Magar PeDon Ki ShaKHon Par Nae Patton Ke Aane Mein Abhi Kuchh Din Lagenge

zara mausam to badla hai magar peDon ki shaKHon par nae patton ke aane mein abhi kuchh din lagenge

bahut se zard chehron par ghubar-e-gham hai kam be-shak par un ko muskurane mein abhi kuchh din lagenge

kabhi hum ko yaqin tha zoam tha duniya hamari jo muKHalif hai to ho jae magar tum mehrban ho

hamein ye baat waise yaad to ab kya hai lekin han ise yaksar bhulane mein abhi kuchh din lagenge

jahan itne masaib hon jahan itni pareshani kisi ka bewafa hona hai koi saneha kya

bahut maqul hai ye baat lekin is haqiqat tak dil-e-nadan ko lane mein abhi kuchh din lagenge

koi TuTe hue shishe liye afsurda-o-maghmum kab tak yun guzare be-talab be-arzu din

to in KHwabon ki kirchen hum ne palkon se jhaTak din par nae arman sajaane mein abhi kuchh din lagenge

tawahhum ki siyah shab ko kiran se chaak kar ke aagahi har ek aangan mein naya suraj utare

magar afsos ye sach hai wo shab thi aur ye suraj hai ye sab ko man jaane mein abhi kuchh din lagenge

purani manzilon ka shauq to kis ko hai baqi ab nai hain manzilen hain sab ke dil mein jin ke arman

bana lena nai manzil na tha mushkil magar ai dil nae raste banane mein abhi kuchh din lagenge

andhere Dhal gae raushan hue manzar zamin jagi falak jaga to jaise jag uTThi zindagani

magar kuchh yaad-e-mazi oDh ke soe hue logon ko lagta hai jagane mein abhi kuchh din lagenge