Parastar

wo jo kahlata tha diwana tera

wo jise hifz tha afsana tera

jis ki diwaron pe aawezan thin

taswiren teri

wo jo dohraata tha

taqriren teri

wo jo KHush tha teri KHushiyon se

tere gham se udas

dur rah ke jo samajhta tha

wo hai tere pas

wo jise sajda tujhe karne se

inkar na tha

us ko dar-asl kabhi tujh se

koi pyar na tha

us ki mushkil thi

ki dushwar the us ke raste

jin pe be-KHauf-o-KHatar

ghumte rahzan the

sada us ki ana ke dar pe

us ne ghabra ke

sab apni ana ki daulat

teri tahwil mein rakhwa di thi

apni zillat ko wo duniya ki nazar

aur apni bhi nigahon se chhupane ke liye

kaamyabi ko teri

teri futuhat

teri izzat ko

wo tere nam teri shohrat ko

apne hone ka sabab jaanta tha

hai wajud us ka juda tujh se

ye kab manta tha

wo magar

pur-KHatar raston se aaj nikal aaya hai

waqt ne tere barabar na sahi

kuchh na kuchh apna karam us pe bhi farmaya hai

ab use teri zarurat hi nahin

jis ka dawa tha kabhi

ab wo aqidat hi nahin

teri tahwil mein jo rakkhi thi kal

us ne ana

aaj wo mang raha hai wapas

baat itni si hai

ai sahib-e-nam-o-shohrat

jis ko kal

tere KHuda hone se inkar na tha

wo kabhi tera parastar na tha

(836) Peoples Rate This

Your Thoughts and Comments

Parastar In English By Famous Poet Javed Akhtar. Parastar is written by Javed Akhtar. Read famous Poem Parastar for youth and Student by Javed Akhtar. Free Download Parastar in PDF.