Fitna-e-gardish-e-ayyam Se Ji Darta Hai

fitna-e-gardish-e-ayyam se ji Darta hai

saya-e-zulf-e-siyah-e-fam se ji Darta hai

din ke sine mein dhaDakte hue lamhon ki qasam

shab ki raftar-e-subuk-gam se ji Darta hai

wahi tarik dariche wahi be-nur shafaq

partaw-e-mehr-e-tahi-dam se ji Darta hai

wahi be-wajh udasi wahi be-nam KHalish

rasm-e-rah-e-dil-e-nakaam se ji Darta hai

wahi sunsan fazaen wahi viran sa nagar

aa ke baiTho to dar-o-baam se ji Darta hai