Wo Sai Qafas Mein Kar Ki TuTe

wo sai qafas mein kar ki TuTe

is mein rahe baal-o-par ki TuTe

pa-e-talab us ki justuju mein

yan tak phire dar-ba-dar ki TuTe

rone ka tar bandh raha hai

aisa na ho chashm-e-tar ki TuTe

hai be-mai-e-ishq shisha-e-dil

mar us ko tu sang par ki TuTe

duniya se to TuTta nahin dil

aisi kuchh fikr kar ki TuTe

hui bas ki KHushi-e-zaKHm-e-taza

hain Tanke tere jigar ki TuTe

mahshar mein bhi nind ghafilon ki

mumkin nahin be-KHabar ki TuTe

'joshish' har KHar-e-dasht par yan

is tarah qadam na dhar ki TuTe