Yar Apnon Ki KHurafat Pe Gham Kya Karna

yar apnon ki KHurafat pe gham kya karna

dushmanon ke bhi sawalat pe gham kya karna

raat din ashkon ki barsat pe gham kya karna

apne bigDe hue haalat pe gham kya karna

waqt kaisa bhi ho do pal mein guzar jaega

dard mein Dubi hui raat pe gham kya karna

kaam us ka hai satana wo sataega hi

dushman-e-jaan ki KHurafat pe gham kya karna

jaanti thi ki bichhaDna hai hamein aaKHir jab

chand lamhon ki mulaqat pe gham kya karna

bewafai se teri KHub the waqif hum to

phir mili ashkon ki saughat pe gham kya karna