Itna To Zindagi Mein Kisi Ke KHalal PaDe

itna to zindagi mein kisi ke KHalal paDe

hansne se ho sukun na rone se kal paDe

jis tarah hans raha hun main pi pi ke garm ashk

yun dusra hanse to kaleja nikal paDe

ek tum ki tum ko fikr-e-nasheb-o-faraaz hai

ek hum ki chal paDe to bahar-haal chal paDe

saqi sabhi ko hai gham-e-tishna-labi magar

mai hai usi ki nam pe jis ke ubal paDe

muddat ke baad us ne jo ki lutf ki nigah

ji KHush to ho gaya magar aansu nikal paDe