Jab Saba Aai Idhar Zikr-e-bahaar Aa Hi Gaya

jab saba aai idhar zikr-e-bahaar aa hi gaya

yaad hum ko inqalab-e-rozgar aa hi gaya

kis liye ab jabr ki taklif farmate hain aap

banda-parwar main to zer-e-iKHtiyar aa hi gaya

lala-o-gul par jo guzri hai guzarne dijiye

aap ko to mehrban lutf-e-bahaar aa hi gaya

dahr mein rasm-e-wafa badnam ho kar hi rahi

hum bachate hi rahe daman ghubar aa hi gaya

hans ke bole ab tujhe zanjir ki hajat nahin

un ko meri bebasi ka e'tibar aa hi gaya

shikwa-sanji apni aadat mein nahin daKHil magar

dil dukha to lab pe harf-e-nagawar aa hi gaya