Wafa Ka Zikr Nahin Hai Karam Ki Baat Nahin
wafa ka zikr nahin hai karam ki baat nahin
tere suluk mein phir bhi sitam ki baat nahin
tujhe main chahun ye mera nasib hai lekin
agar tu mujh ko na chahe to gham ki baat nahin
hasin sham jo guzri wo yaadgar bani
ye baat waise bhi sach hai bharam ki baat nahin
har ek baat ka meri KHuda rahega gawah
har ek janam ki hai ye ek janam ki baat nahin
ghazal wo kaisi wo naghma hi kya rahega 'kiran'
tere kalam mein jab tak sanam ki baat nahin
Kavita Kiran 
(902) Peoples Rate This