Ruswa Hue Zalil Hue Dar-ba-dar Hue

ruswa hue zalil hue dar-ba-dar hue

haq baat lab pe aai to hum be-hunar hue

kal tak jahan mein jin ko koi puchhta na tha

is shahr-e-be-charagh mein wo mo'tabar hue

baDhne lagi hain aur zamanon ki duriyan

yun fasle to aaj bahut muKHtasar hue

dil ke makan se KHauf ke sae na chhaT sake

raste to dur dur talak be-KHatar hue

ab ke safar mein dard ke pahlu ajib hain

jo log ham-KHayal na the ham-safar hue

badla jo rang waqt ne manzar badal gae

aahan-misal log bhi zer-o-zabar hue