Pak O Hind Yak-jehti

miyan-e-hind-o-pakistan ek sarhad ka jhagDa hai

wagarna is imarat ke manare ek jaise hain

karachi ka kitchen ho ya wo dakan ki rasoi ho

namak ka farq hai bengan bhagare ek jaise hain

pajamon ke design ko badal Dala to kya gham hai

hamari biwiyon ke to gharare ek jaise hain

pareshan haal hai public magar donon mumalik ke

mirasi cricketer filmi sitare ek jaise hain

kanware log to har mulk mein aazad phirte hain

magar shadi-shuda qismat ke mare ek jaise hain

barae aqd-KHwani qaziyon mein farq hai lekin

karachi aur dilli ke chuware ek jaise hain

kanwara aadmi ho ya koi aazad leader ho

jo be-pende ke loTe hain wo sare ek jaise hain

nikamme rahnuma aur aql se paidal siyasat-dan

hamare ek jaise hain tumhaare ek jaise hain

yahan ka KHalid-e-irfan wahan ke 'rahat'-indori

nire shaer hain donon ke sitare ek jaise hain