KHwabon Ki Tilsmati Guphaon Se Nikal Ke

KHwabon ki tilsmati guphaon se nikal ke

dekho kabhi virana-e-jaan aankh ko mal ke

har lamha hai ek aaina-e-umr-e-guzishta

peshani-e-imroz pe bhi zaKHm hain kal ke

tai ho na saka marhala-e-dasht-e-tamanna

diwar bani panw ki zanjir pighal ke

ek rose to ye dil ki taDap lab pe bhi aae

ek rose to ye saghar-e-labrez bhi chhalke

dekha jo kabhi dil ke dariche mein simaT kar

sadiyan milen simTi hui aaghosh mein pal ke

haijaan se hain gunji hui dhyan ki galiyan

dil mein utar aae hain nigahon ke dhundalke

'KHawar' abhi kuchh yaad ki shamen hain farozan

raushan hain dar-o-baam abhi meri ghazal ke