Bujhaen Pyas Kahan Ja Ke Tere Mastane

bujhaen pyas kahan ja ke tere mastane

jo saqiya dar-e-mai-KHana tu na baz kare

nahin wo lazzat-e-azar-e-ishq se aagah

sitam mein aur karam mein jo imtiyaz kare

unhin ke husn se hai garm ishq ka bazar

dua KHuda se hai umr-e-butan daraaz kare

KHuda ka nam bhi lo bazuon se kaam bhi lo

tu fikr-e-kar-e-KHudawand-e-kar-saz kare

hawa-o-hirs se 'nazir' rahe jo pak nazar

to ham-sari na haqiqat ki kyun majaz kare