Aag Hai Pani Hai MiTTi Hai Hawa Hai Mujh Mein

aag hai pani hai miTTi hai hawa hai mujh mein

aur phir manna paDta hai KHuda hai mujh mein

ab to le de ke wahi shaKHs bacha hai mujh mein

mujh ko mujh se jo juda kar ke chhupa hai mujh mein

jitne mausam hain sabhi jaise kahin mil jaen

in dinon kaise bataun jo faza hai mujh mein

aaina ye to batata hai main kya hun lekin

aaina is pe hai KHamosh ki kya hai mujh mein

ab to bas jaan hi dene ki hai bari ai 'nur'

main kahan tak karun sabit ki wafa hai mujh mein