Jo Nahin Hai Usi Manzar Mein Bahut Hota Hai

jo nahin hai usi manzar mein bahut hota hai

ye suna hai to mere ghar mein bahut hota hai

haarna mera muqaddar hai ye sab jaante hain

shor phir kyun mere lashkar mein bahut hota hai

aise hi aati nahin ishq mein sajda-sifati

KHun ka zor qalandar mein bahut hota hai

waqt se dahr ki har chiz pe hota hai asar

kam jo dikhta hai muqaddar mein bahut hota hai

pyas bujhti hai kahan tishna-labon ki is se

pani kahne ko samundar mein bahut hota hai

kuchh karishma bhi dikhati hai lahu ki KHushbu

kuchh maza bhi hawas-e-zar mein bahut hota hai

'tur' wo chahe to sarsabz mujhe bhi kar de

moajaza dast-e-hunar-war mein bahut hota hai