Gumun Nahin To Kya Main Kahin Ja Ke PaD Rahun

gumun nahin to kya main kahin ja ke paD rahun

bimar aadmi ki tarah raat kaT dun

dekhega aaj meri taraf kaun pyar se

bujhta hua charagh hun patjhaD ka chand hun

taswir ban ke dekh raha hun jahan ko

tu hi bata ki aur main ab kaise chup rahun

shirin hai zahr maut ka ai talKHi-e-hayat

ji chahta hai aaj tera jam toD dun

is bare mein to aap se behtar hun main zarur

pina bhi paD gaya to piya hai KHud apna KHun

KHat likh ke phaD dena mere mashghalon mein hai

paDhti rahi hai aag mera nama-e-zubun

gir jaegi ye chhat jo chali jhum kar hawa

'rahi' meri hayat hai ek qasr-e-be-sutun