Nauha

siyah-raat mein TimTimate sitaron ke niche

KHaroshan samundar ki maujen tujhe DhunDhti hain

KHaroshan hawa ki sadaon mein teri sada hai

mera dil tujhe DhunDhta hai

siyah-raat ashkon ki shabnam mein soi hui hai

har ek pal har ek lamha mazi ka

zinda hai maujud mein jagta hai

magar tera paikar

tah-e-KHak andheron ke maman mein soya hua hai

mera dil ki matam-gar-e-raftagan hai

tujhe DhunDhta hai

main aasuda-e-reg-e-KHamosh

us raat ki jalti aankhon ko dekhun

siyah-raat mein TimTimate hue

un sitaron se puchhun

KHaroshan samundar mein Duba hua chand

kisi ajnabi sar zamin par tabassum-kunan hai

nuqush-e-kaf-e-pa ki manzil kahan hai?

yam-e-zindagi sail-dar-sail bahta hua

ek lamhe ko ruk kar palaT kar na dekhe

siyah-raat mein TimTimate sitaron ke niche

faqat ek shab be-sada jagti hai

shab-e-be-sada puchhti hai

bipharti hui mauj-e-dariya kidhar se chali thi?

kidhar ko chali hai?

mera dil ki matam-gar-e-raftagan hai

kise DhunDhta hai

(354) Peoples Rate This

Your Thoughts and Comments

Nauha In English By Famous Poet Mahmood Ayaz. Nauha is written by Mahmood Ayaz. Read famous Poem Nauha for youth and Student by Mahmood Ayaz. Free Download Nauha in PDF.