Dil Apna Harif-e-saill-e-bala Ab Kya Kahen Kitna TuT Gaya

dil apna harif-e-saill-e-bala ab kya kahen kitna TuT gaya

aaj aur thapeDe Takrae aaj aur kinara TuT gaya

paikar hi jin ka shewa ho wo tund hawaen kya samjhen

gulzar to hum par tang hua bazu to hamara TuT gaya

miTTi se KHwab tarasha tha so us ki ye tabir mili

ab aadha gharaunda baqi hai aur aadha gharaunda TuT gaya

ghar bhi wahi ghar wale bhi wahi par kya lage is mahaul mein ji

diwar se rishta qaem hai sae se rishta TuT gaya

jis ke liye bachcha roya tha aur ponchhe the aansu baba ne

wo bachcha ab bhi zinda hai wo mahnga khilauna TuT gaya

kab dida-e-gul hua daman jo jab chhoD gai gul ko KHushbu

kab aaya shajar ko hosh-e-numu jab patta patta TuT gaya