Ahbab Ke Qarib Mohabbat Se BaiThiye

ahbab ke qarib mohabbat se baiThiye

izzat jo mil gai hai to izzat se baiThiye

un ki gali mein jaana zaruri nahin magar

jaana jo ho gaya to sharafat se baiThiye

anjam-e-ishq Thik hi hoga janab-e-shaiKH

fursat se aa gae ho to fursat se baiThiye

sahil se har KHushi ka nazara fuzul hai

tufan-e-gham mein rah ke bhi himmat se baiThiye

nafrat ki baat karna gunah-e-azim hai

mahbub ke qarib to chahat se baiThiye

rah rah ke gir rahi hain nigahon ki bijliyan

aa kar hamare pas mohabbat se baiThiye

'maikash' ko pine dijiye zulfon ki chhanw mein

kuchh der us ke pas mohabbat se baiThiye