Nazar Mein Ek Jahan Hai Aur Tamanna Ka Jahan Wo Bhi

nazar mein ek jahan hai aur tamanna ka jahan wo bhi

jo tair-e-fikr hai rahta hai har-dam par-fishan wo bhi

zara Thahro ki paDh lun kya likha mausam ki barish ne

meri diwar par likhti rahi hai dastan wo bhi

mohabbat mein dilon par jaane kab ye saneha guzra

jagah shak ne bana li aur hamare darmiyan wo bhi

suno ai raftagan rahta nahin kuchh fasla itna

bas ek diwar baqi hai meri diwar-e-jaan wo bhi

jahan par na-rasai hi riyazat ka sila Thahre

hamein dil ne sikha rakkha hai ek kar-e-ziyan wo bhi

nae imkan ki jaanib safar mein jab taraddud ho

sada kanon mein aati hai sada-e-kun-fakan wo bhi

kisi dildar saat mein kisi mahbub lahje ka

dikhati hai tamasha aur meri umr-e-rawan wo bhi